Состанок на секторската работна група „Образование, вработување и социјална политика“

За да се постигне социо-економски развој во Република Македонија потребна е директна координација помеѓу политиките за вработување и образовните политики. 

Во таа насока,  денеска во Владата на Република Македонија се одржа работен состанок на секторската работна група „Образование, вработување и социјална политика“. Покрај националните институции, за прв пат учествуваа и претставниците на донаторската заедница, како и претставници на граѓанските организации, со што ќе се овозможи  подобра координација помеѓу институциите и донаторите на политичко и техничко ниво. 

Секторската група ја координираат Министерството за труд и социјална политика и Министерството за образование и наука. Воведни обраќања имаа министерките Царовска и Дескоска, и Никола Бертолини, раководител на Секторот за соработка во Делегацијата на ЕУ. 

МТСП ги претстави клучните предизвици и планови - реформата на системот за социјална заштита, деинституционализацијата, мерките за вработување и зголемување на вработливоста, родовата еднаквост, раниот детски развој и решавање на прашањето на лицата без документи. 

Министерството за образование и наука е фокусирано на реализација на Стратегијата за образованието 2018-2025, односно реформата во предучилишното, основното и средното образование, хармонизацијата на образованието со пазарот на труд, инклузивните образовни практики и воспоставување на систем за евалуација и обезбедување на квалитет во високото образование. 

Целта на оваа секторската група е да се канализира секторскиот дијалог за да се осигура заедничката работа на приоритетните мерки и политики во секторот „Образование, вработување и социјална политика“, и да се воспостави усогласеност и синергија помеѓу разните иницијативи. Исто така, преку ваквиот пристап, буџетските средства и целата помош и ресурси што стојат на располагање, ќе се користат целисходно, транспарентно и на најдобар начин за остварување на зацртаните политики.

Владата се заложи до 2019 година, да воспостави целосно координиран секторски пристап помеѓу сите институции, донатори и партнерски организации.