31.05.2023

Trençevska: Gjithmonë është koha e duhur për të miratuar një ligj që do të jetë në përputhje me ndryshimet në fushën e punës

Ministrja e Punës dhe Politikës Sociale, Jovanka Trençevska, sot foli në konferencën vjetore “Tranzicioni ndërmjet legjislacionit të ri dhe atij ekzistues të punës në Maqedoninë e Veriut – shumë herët apo tepër vonë për ligj të ri për marrëdhëniet e punës?” organizuar nga Shoqata për Punë dhe Ligji Social i Maqedonisë së Veriut, me mbështetjen e Organizatës Ndërkombëtare të Punës. Me përshëndetje u drejtua edhe Dekani i Fakultetit Juridik “Justiniani I” në Shkup, Universiteti “Shën Kirili dhe Metodi", Sasho Georgievski, kryetari i Shoqatës për të Drejtën e Punës dhe të drejtën Sociale të Maqedonisë së Veriut, Todor Kalamatiev, nënkryetar i Shoqatës për të Drejtën e Punës dhe të drejtën Sociale të Maqedonisë së Veriut, Aleksandar Ristovski dhe koordinatori kombëtar i Organizatës Ndërkombëtare të Punës në Maqedoninë e Veriut, Emil Kërstanovski.

“Marrëdhëniet e mira të punës janë ato ku ka një balancë forcash në marrëdhënien e punës, ku marrëdhënia punonjës-punëdhënës është në përmirësim të vazhdueshëm, gjë që nga ana tjetër sjell më pak mosmarrëveshje mes tyre.Këto janë marrëdhënie në të cilat punëtorët janë të kënaqur dhe për të cilat ata kanë një pagë të drejtë dhe të mirë, dhe vendi i tyre i punës është i sigurt. Ekzistenca e rregullave të qarta midis të dyja palëve dhe respektimi i tyre kontribuon që çdo kompani të jetë në gjendje të krijojë një mjedis pune produktiv që inkurajon rritjen e biznesit”, tha Trençevska.

Ministrja iu referua përgatitjes së Ligjit të ri për Marrëdhëniet e Punës dhe theksoi se procesi i hartimit ishte plotësisht gjithëpërfshirës sepse janë përfshirë të gjithë ata që mund të kontribuojnë në formësimin e ligjit dhe përmbajtjes së tij.

“Duke u nisur nga rëndësia e të dyja palëve të marrëdhënies së punës në konceptimin e rregullave të marrëdhënies së punës, partnerët tanë kryesorë ishin përfaqësuesit e sindikatave dhe shoqatave të punëdhënësve. Kjo nënkuptonte ngritjen e dialogut trepalësh, pra të dialogut social në nivel kombëtar, në një pozitë shumë të lartë. Kemi treguar se duam të dëgjojmë zërin e punëtorëve, të komunitetit të biznesit, por edhe të organizatave të shoqërisë civile, përfaqësuesve të gjykatave dhe komunitetit akademik”, theksoi ministrja Trençevska.

Ministrja fjalimin e saj e përmbylli me përgjigjen ndaj pyetjes që mban emrin e konferencës dhe theksoi se është gjithmonë koha e duhur për të miratuar një ligj që do të jetë në përputhje me ndryshimet në fushën e punës, i cili do të jetë një bazë e mire për avansimin e mëtejshëm të marrëdhënieve ndërmjet punëtorëve dhe punëdhënësve, për rritjen e produktivitetit të punës dhe krijimin e vendeve të reja të punës.