23.06.2023
Trençevska: Eliminimi i gjuhës së urrejtjes dhe diskriminimi janë kyçe në realizimin e të drejtave të njeriut
Ministrja e Punës dhe Politikës Sociale, Jovanka Trençevska, po merr pjesë në konferencën ndërkombëtare “Të drejtat e njeriut në kuadër të mbrojtjes nga diskriminimi” në Mal të Zi.
Konferencën e hapi ministri për të Drejtat e Njeriut dhe të Pakicave të Malit të Zi, Fatmir Gjeka, i cili ishte edhe nikoqir i aktivitetit. Ambasadori i Republikës së Maqedonisë së Veriut në Mal të Zi, Sh.T. Zeqir Ramçiloviq, mbajti fjalën hapëse, ku morën pjesë ministra të vendeve të rajonit, përfaqësues të organizatave ndërkombëtare dhe të Bashkimit Evropian.
Ministrja Trençevska foli në panelin “Lufta kundër gjuhës së urrejtjes – fushë bashkëkohore e antidiskriminimit”, ku iu referua stereotipave për rolet gjinore në shoqëri, për gjuhën e urrejtjes, si dhe për përgjegjësinë e secilit individ në shoqëri, veçanërisht personaliteteve publike për respektimin e të drejtave të njeriut dhe komunikimit jo të dhunshëm.
“Mosinformimi dhe mospranimi i diversitetit janë pjesë e arsyeve kryesore të ekzistencës së stereotipave dhe paragjykimeve për gratë dhe burrat në shoqëri. Çdo stereotip dhe paragjykim çon në diskriminim, trajtim të pabarabartë dhe mosrespektim të njerëzve dhe kjo çon në shkelje të të drejtave të njeriut dhe vlerave shoqërore”, tha Trençevska.
Ajo iu referua gjendjes së çështjes së barazisë gjinore dhe gjuhës së urrejtjes në shoqërinë maqedonase, duke theksuar se në 5 vitet e fundit është bërë një hap i madh përpara.
“Në këtë moment kemi 43% gra deputete në Parlament, 35% këshilltare në pushtetin vendor dhe 5 gra ministre. Por nuk mjafton të thuhet se shoqëria jonë është e ndjeshme gjinore dhe se de fakto ofron mundësi të barabarta. Sa më shumë femra të jenë prezente në proceset e vendimmarrjes, aq më shumë shprehet gjuha e urrejtjes në media”, tha Trençevska.
Ministrja theksoi se pavarësisht përkushtimit dhe përpjekjeve që bëhen për sensibilizimin e shoqërisë, gjuha e urrejtjes është një nga format më të zakonshme të intolerancës dhe ksenofobisë.
“Me keqardhje konfirmoj se rrjetet sociale në muajt e fundit janë vendi i organizimit të lëvizjeve të para antigjinore në vendin tonë, të cilat janë të mbushura me gjuhë urrejtjeje, nënçmimi, stigmatizimi dhe kjo është veçanërisht shqetësuese. Ligji i ri për Barazinë Gjinore, për të cilin Sektori për Shanse të Barabarta në Ministrinë e Punës dhe Politikës Sociale po punon më shumë se me përkushtim, është objektivi i këtyre lëvizjeve, të cilat nuk janë aspak në drejtim të aspiratave pro-evropiane që ne e vlerësojmë si shtet dhe si qeveri. Një ligj që duhet të promovojë barazi, mundësi për të gjithë, krijon stigmë dhe intolerancë”, tha Trençevska.
Ministrja theksoi se çdo individ në shoqëri ka përgjegjësi për të respektuar të drejtat e njeriut dhe komunikimin jo të dhunshëm, veçanërisht kur bëhet fjalë për personat që janë pjesë e jetës publike.
“Reagimi ndaj gjuhës së urrejtjes me bazë gjinore në publik nuk duhet të vijë vetëm nga gratë, gjë që ndodh shpesh, por edhe burrat që janë pjesë e jetës publike duhet të tregojnë përgjegjësi të barabartë. Barazia gjinore nuk është vetëm çështje e grave, ajo është çështje e të drejtave themelore të njeriut”, tha Trençevska.
Në panel diskutimi u bisedua edhe për gjuhën e urrejtjes, e cila u bë veçanërisht e theksuar me shfaqjen dhe përhapjen e përdorimit të internetit dhe rrjeteve sociale. Në këtë drejtim, ministrja theksoi se gratë e reja, gratë nga jeta publike dhe gratë politikane janë cak i gjuhës së urrejtjes në jetën e përditshme.
“Si grua dhe si ministre e Punës dhe Politikës Sociale, gjithmonë qëndroj për solidaritet, përgjegjësi dhe drejtësi dhe me këtë synim qëndroj edhe në mbrojtje të grave që janë shënjestër e gjuhës së urrejtjes në internet dhe në të njëjtën kohë edhe unë kam bërë kallëzim penal kundër atyre që përhapin gjuhë të urrejtjes”, tha Trençevska.
Ministrja informoi gjithashtu se në muajin mars të këtij viti, Ministria e Punës dhe Politikës Sociale përmes fushatës “Me zë të lartë dhe e guximshme” tregoi se sa e rëndësishme është të flitet për gjuhën e urrejtjes, t'i japë mbështetje çdo gruaje, por edhe për të inkurajuar çdo grua. Njëkohësisht ajo theksoi se në periudhën e ardhshme në bashkëpunim me Këshillin e Evropës do të punohet në temën e dhunës në internet, ku fokusi do të jetë tek të rinjtë, me qëllim fuqizimin e të rinjve për të njohur dhunën dhe barazinë gjinore.
“Lufta kundër gjuhës së urrejtjes me bazë gjinore dhe diskriminimit ndaj grave është një problem që prek të gjitha vendet e rajonit. Lëvizjet antigjinore janë të pranishme kudo, me synimin kryesor përmbysjen e demokracisë në shoqëritë tona moderne. Prandaj kemi nevojë për bashkëpunim më të madh rajonal, aktivitete të përbashkëta, në të cilat do të fokusohemi në të ardhmen dhe që do të jenë garanci për sundimin e barazisë. Këtu mund të fillojmë një platformë për një përgjigje kolektive ndaj gjuhës së urrejtjes drejtuar grave. Po e përsëris – jemi të forta, të guximshme dhe të vendosura”, tha Trençevska në konferencën ndërkombëtare në Mal të Zi.