25.09.2025

Sabriu: Përmes shkëmbimit të përvojave nga rajoni, së bashku mund të krijojmë shpresa të reja dhe të mbrojmë të drejtat e azilkërkuesve

Sekretari shtetëror i Ministrisë së Politikës Sociale, Demografisë dhe Rinisë, Fatmir Sabriu, ka hapur sot konferencën rajonale “Mbrojtja dhe perspektivat ekonomike: Inkurajimi i pjesëmarrjes në punën e azilkërkuesve në Ballkanin Perëndimor”, organizuar nga Iniciativa Rajonale për Migrim, Azil dhe Refugjatë, MARRI, në bashkëpunim me Shoqatën Gjermane për Bashkëpunim Ndërkombëtar, GIZ.

Në fjalën e tij para të pranishmëve, ai iu referua sfidave me të cilat përballen azilkërkuesit dhe detyrimit të institucioneve dhe aktorëve të tjerë shoqërorë për të mbrojtur të drejtat e tyre.

“Para se të fillojmë të flasim për shifra, statistika, ligje dhe procedura, dua të theksoj se në radhë të parë po flasim për njerëz, për histori njerëzore, për luftën për jetën. Dhe sa herë që flasim për azilkërkues, le të kemi parasysh se po flasim për njerëz që lanë shtëpitë e tyre për një të ardhme më të mirë për veten dhe familjet e tyre. Njerëzit që ikin nga persekutimi, dhuna dhe shtypja po kërkojnë siguri dhe një shans për të rindërtuar jetën e tyre”, theksoi Sabriu.

Ai shprehu kënaqësinë që në konferencë morën pjesë edhe përfaqësues nga rajoni, e cila paraqet një mundësi reale për diskutim dhe shkëmbim të përvojave për avancimin e proceseve përmes të cilave azilkërkuesit ushtrojnë të drejtat e tyre.

“Në kohën kur po përballemi me mungesë të fuqisë punëtore për shkak të largimit të qytetarëve tanë jashtë vendit, pranisë së punëtorëve të huaj, janë pikërisht azilkërkuesit ata që mund të kontribuojnë në zgjidhjen e situatës me mungesën e popullatës punëtore nëse integrohen siç duhet në tregun tonë të punës. Përveç përfitimeve ekonomike, përfshirja e tyre në tregun e punës nxit kohezionin social dhe mirëkuptimin ndërmjet komuniteteve. Duke përqafuar diversitetin, ne nxisim shoqëri më të fuqishme dhe më elastike”, tha Sabriu.

Ai u bëri thirrje të pranishmëve dhe publikut të gjerë që të qëndrojnë së bashku në mbrojtjen e të drejtave të azilkërkuesve. Avokimi, dhembshuria dhe mirëkuptimi janë thelbësore.

“Është detyra jonë të sigurojmë që të gjithë, pavarësisht nga prejardhja e tyre, të gjejnë siguri dhe shpresë diku tjetër.  Shpresa e re për një të nesërme më të mirë qoftë vendi im ose juaji. Së bashku ne mund të inkurajojmë krijimin e një rajoni më gjithëpërfshirës dhe më elastik”, theksoi Sabriu.