Портокалова фаза на територијата на градовите Гевгелија, Богданци, Валандово и Дојран на 11 и 12 јуни, донесени препораки за ослободување од работа на најранливите групи на население

Министерството за труд и социјална политика ги повикува работодавачите, негователите и воспитувачите во градинките, вработените во Центрите за социјална работа, во Црвениот крст на РСМ да ги почитуваат препораките од Министерството за здравство, за заштита на здравјето и превенирање на последиците од топлотните бранови кои следуваат.

Имено, Владата на денешната седница ги усвои препораките од Министерството за здравство за намалување на ризиците од високите температури, согласно Акцискиот план на Министерството за превенирање на последиците од топлотните бранови врз здравјето на населението за територијата на градовите Гевгелија, Богданци, Валандово и Дојран, која ќе биде зафатена од високи температури-портокалова фаза, во следните два дена, 11 и 12 јуни 2024 година (вторник и среда), и тоа: 

-Ослободување од работните обврски на најранливите групи население, поточно: бремените жени и лицата на возраст над 60 години;

-Во установите за згрижување на децата (градинки) да не се практикува физичка активност и да не ги изнесуваат децата на отворено во периодот од 11:00 до 17:00 часот;

-Единиците на локалната самоуправа, Црвениот крст на РСМ и Центрите за социјални работи, во регионите зафатени со топлотниот бран да пружаат помош на осамени, стари, изнемоштени лица и бездомни лица;

-Со оглед на фактот дека одредени ризични производни и технолошки процеси може да претставуваат дополнителен ризик по здравјето на изложените работници, се потсетуваат работодавачите на обврската за почитување на законските прописи од оваа област.