ИПА III Годишна акциска програма за Република Северна Македонија за 2024 година
Финансиската спогодба за Годишната акциска програма 2024 година беше потпишана од страна на Владата на Република Северна Македонија и Европската Kомисија на 2 октомври 2024 година.
Годишната акциска програма на Република Северна Македонија за ИПА 2024 година се состои од четири акции.
Акцијата 1 „ЕУ за права и безбедност“ предвидува поддршка за политиките на земјата во областа на фундаменталните права.
„ЕУ ЗА ПРАВА И БЕЗБЕДНОСТ”
Акцијата „ЕУ за права и безбедност” ќе придонесе за подобрување на почитувањето на човековите права и зајакнување на безбедноста.
Една од специфичните цели на оваа акциска програма е зајакнат одговор на националниот систем за справување со родово-базираното и семејно насилство и унапредување на состојбата со домувањето на Ромите.
Очекувани резултати
Со реализација на проектите во рамки на оваа програма се очекува да се постигнат:
- подобрени услуги за заштита на жртвите на родово-базирано и семејно насилство, преку поддршка за нивно воспоставување и развој;
- зајакната меѓуинституционална соработка на национално и локално ниво за родово-базирано и семејно насилство, преку воспоставување на интегриран систем за прибирање податоци, следење и известување од страна на релевантните институции;
- поддржано детално урбанистичко планирање и подготовка на проектна документација за идни инвестиции во социјално домување во дел од ромските населби.
Финансирање и начин на имплементација
Вкупниот буџет на Акцијата „ЕУ за права и безбедност” изнесува 6.8 мил. евра, од кои ЕУ (ИПА) учествува со 6.5 мил. евра, а 0.3 мил. евра се учество на корисниците.
Спроведувањето на проектите ќе се одвива според правилата за јавна набавка на ЕУ, а Делегацијата на Европската Унија (ДЕУ) ќе биде договорен орган.
Планирано е да се доделат договори за грантови и договори за услуги.
Документи
ИПА III Годишна акциска програма за Република Северна Македонија за 2023 година
Буџетска поддршка за отпорност и справување со енергетската криза
На почетокот на февруари 2023 година, Владата на Република Северна Македонија и Европската Комисија потпишаа Финансиска спогодба за Годишната акциска програма за ИПА 2023 година. Оваа програма предвидува буџетска поддршка на Националниот енергетски акциски план за 2022-2023 година и е дел од Пакетот за енергетска поддршка на Европската Унија за земјите од Западен Балкан финансиран од ИПА III 2021-2027.
Целта на буџетската поддршка на Европската Унија е ублажување на непосредните социо-економски последици од енергетската криза. Воедно, таа ги поддржува структурните реформи во енергетскиот сектор, а особено т.н. енергетската транзиција, вклучително и заштита на ранливите корисници на енергија.
Владата ќе биде поддржана во спроведење на мерките за намалување и спречување на енергетската сиромаштија преку помош на економијата и на ранливите домаќинства и обезбедување непрекината испорака и пристап до основните услуги.
ИПА Годишната акциска програма за 2023 е во вкупен износ од 80 милиони евра.
Програмата е координирана од Министерството за економија.
Министерството за труд и социјална политика учествува во остварувањето на Резултатот 2.2. Зајакнат систем за заштита на најранливите жени, мажи и деца и други корисници од оваа Акција, кој се очекува да опфати над 190 000 домаќинства со право на поддршка за справување со ценовната и енергетската криза.
Во периодот декември 2022 – март 2023, Министерството за труд и социјална политика обезбеди финансиска поддршка за справување со енергетската криза на над 177 000 социјално исклучени граѓани, вклучително и деца, лица кои останале без работа и користат паричен надоместок за невработеност и корисници на минимална пензија, согласно Законот за финансиска поддршка на социјално ранливи категории на граѓани за справување со енергетската криза (246/22).
Покрај тоа, 46 000 корисници на правото на гарантирана минимална помош и социјална сигурност примаат паричен додаток за енергенси во периодот на зимските месеци, согласно Законот за социјалната заштита (104/19) и Законот за социјална сигурност на старите лица (104/19).
Севкупно, опфатени се околу 220 000 корисници во ризик и директно преку постојните системи на Министерството за труд и социјална политика, Фондот за пензиско и инвалидско осигурување и Агенцијата за вработување на Република Северна Македонија се исплатени околу 24 милиони евра.
Документи:
ИПА III Годишна акциска програма за Република Северна Македонија за 2022 година
Владата на Република Северна Македонија и Европската Комисија ја потпишаа Финансиската спогодба за Годишната акциска програма за ИПА 2022 година на 21 декември 2023.
Годишната акциска програма на Република Северна Македонија за ИПА 2022 година се состои од пет акции. Акцијата 5 „ЕУ за подобрено здравје, родова рамноправност и социјална политика“ предвидуваат поддршка за политиките на земјата во секторот „Образование, вработување и социјална политика“.
ЕУ ЗА ПОДОБРЕНО ЗДРАВЈЕ, РОДОВА РАМНОПРАВНОСТ И СОЦИЈАЛНА ПОЛИТИКА
Акцијата „ЕУ за подобрено здравје, родова рамноправност и социјална политика“ ќе придонесе за подобрување на здравјето и благосостојбата на населението во Северна Македонија и поддршка на промоцијата на еднаквите можности и пристапот до квалитетни работни места и социјална заштита за сите.
Очекувани резултати
- Подобрен систем и практики за безбедност и здравје при работа (БЗР) преку зајакнување на капацитетите на релевантните чинители за справување со политиките и практиките за БЗР и обезбедување подобрена законска усогласеност со барањата за БЗР. Посебен фокус ќе се даде на унапредувањето на административните капацитети на Државниот инспекторат за труд и на системот за известување.
- Поголема ефикасност на системот за спречување и заштита од родово-базирано и семејно насилство преку поддршка и развој на услугите за жртвите на родово-базирано и домашно насилство;
- Подобрен систем за обезбедување квалитет на социјалните услуги преку унапредување на системот за мониторинг и евалуација.
Финансирање и начин на имплементација
Вкупниот буџет на Акцијата „ЕУ за подобрено здравје, родова рамноправност и социјална политика“ е 5,12 милиони €, во кои ЕУ (ИПА) учествува со 5 милиони €.
Спроведувањето на проектите ќе се одвива според правилата за јавна набавка на ЕУ, а Делегацијата на Европската Унија (ДЕУ) ќе биде договорен орган.
Планирано е да се доделат договори за грантови и договор за услуги.
Документи
Одлука на Европската Комисија [C(2022) 9166 од 5.12.2022] за финансирање на Годишниот акционен план за поддршка на Република Северна Македонија за 2022 година
Финансиска спогодба - Посебни услови
ИПА 2022 Годишна акциска програма „ЕУ за подобрено здравје, родова рамноправност и социјална политика“
Општи услови
ИПА II Годишна акциска програма за Република Северна Македонија за 2020 година
Акција „Поддршка на ЕУ за социјална и економска отпорност на Северна Македонија“
Во септември 2020, Владата на Република Северна Македонија и Европската комисија потпишаа измени и дополнувања на Финансиската спогодба за Годишната акциска програма за ИПА 2020 година. Со измените се воведе новата Акција „Поддршка на ЕУ за социјална и економска отпорност на Северна Македонија“ во рамки на секторот „Конкурентност, иновации, земјоделство и рурален развој“.
Пакетот на мерки содржани во акцијата „Поддршка на ЕУ за социјална и економска отпорност“ (EU4Resiliance) во вкупен износ од 40 милиони евра ја поддржува Република Северна Македонија и економијата во периодот на закрепнување за ублажување на негативните социо-економски влијанија на Ковид-19.
Повеќе