Средба на министерката Шахпаска со новиот француски амбасадор Бомгартнер: Поддршката што Франција ни ја дава во градењето на еднакво општество е непроценлива, ќе ја продлабочиме соработката во делот на социјалната политика и трудот
Министерката за труд и социјална политика, Јагода Шахпаска, денеска оствари средба со новоименуваниот амбасадорот на Република Франција во Република Северна Македонија, Сирил Бомгартнер.
Министерката Шахпаска му посака добредојде на амбасадорот Бомгартнер во земјава и изрази надеж дека и во наредниот период ќе продолжи успешната соработка меѓу двете земји.
![](content/слика за содржина фран. ам.jpg)
„Нам како држава ни е од исклучително значење поддршката што ја имаме од Франција во евроинтеграцискиот процес и во воспоставувањето на европските вредности. Франција ни дава значајна поддршка во процесот на градење демократско општество, во кое сите имаат еднакви можности за напредок и во кое нема дискриминација по ниту еден основ“, нагласи министерката Шахпаска.
Амбасадорот Бомгартнер истакна дека историските врски кои што постојат помеѓу Република Северна Македонија и Република Франција се пријателски, како на билатерален, така меѓу поединечни градови истакнувајќи го примерот со Битола.
![](content/слика за содржина - француски амбасадор.jpg)
“Вашата земја прави многу работи во однос на родовата еднаквост, особено во делот на надминување на одредени стереотипи, по што Република Северна Македонија е пример во регионот“, рече амбасадорот Бомгартнер.
Тој изрази надеж дека Република Северна Македонија ќе продолжи со реформите и покрај пречките што се појавија на нашиот евроинтеграциски пат и очекува дека пречките ќе бидат надминати.
![](content/слика за содржина - фр. ам..jpg)
Двајцата соговорници се согласија дека Република Северна Македонија добро се справува со здравствената и со економската криза предизвикана од пандемијата КОВИД-19 и најавија дека двете земји во наредниот период треба да работат на продлабочување на меѓусебната соработка во делот на трудот и социјалната политика.